สามภาณ

kit007

สามภาณ
มะหากัสสะปะโพชฌังคะสุตตะปาโฐ

...........เอวัมเม สุตัง ฯ เอกัง สะมะยัง ภะคะวา ราชะคะเห วิหะระติ เวฬุวะเน  กะลันทะกะนิวาเป ฯ เตนะ โข ปะนะ สะมะเยนะ อายัสมา มะหากัสสะโป ปิปผะลิคุหายัง  วิหะระติ อาพาธิโก ทุกขิโต พาฬหะคิลาโน ฯ ...........อะถะโข ภะคะวา สายัญหะสะมะยัง  ปะฏิสัลลานา วุฏฐิโต เยนายัสมา มะหากัสสะโป เตนุปะสังกะมิ อุปะสังกะมิตวา  ปัญญัตเต อาสะเน นิสีทิ ฯ นิสัชชะ โข ภะคะวา อายัสมันตัง  มะหากัสสะปัง เอตะทะโวจะ ...........กัจจิ เต กัสสะปะ ขะมะนียัง กัจจิ ยาปะนียัง กัจจิ ทุกขา เวทะนา  ปะฏิกกะมันติ โน อะภิกกะมันติ ปะฏิกกะโมสานัง ปัญญายะติ โน อะภิกกะโมติ ฯ นะ เม  ภันเต ขะมะนียัง นะ ยาปะนียัง พาฬหา เม ทุกขา เวทะนา อะภิกกะมันติ โน  ปะฏิกกะมันติ อะภิกกะโมสานัง ปัญญายะติ โน ปะฏิกกะโมติ ฯ ...........สัตติเม กัสสะปะ โพชฌังคา  มะยา สัมมะทักขาตา ภาวิตา พะหุลีกะตา อะภิญญายะ สัมโพธายะ นิพพานายะ สังวัตตันติ  ฯ กะตะเม สัตตะ ฯ ...........สะติสัมโพชฌังโค โข กัสสะปะ มะยา สัมมะทักขาโต ภาวิโต พะหุลีกะโต  อะภิญญายะ สัมโพธายะ นิพพานายะ สังวัตตะติ ฯ ...........ธัมมะวิจะยะสัมโพชฌังโค โข  กัสสะปะ มะยา สัมมะทักขาโต ภาวิโต พะหุลีกะโต อะภิญญายะ สัมโพธายะ นิพพานายะ  สังวัตตะติ ฯ ...........วิริยะสัมโพชฌังโค โข กัสสะปะ มะยา สัมมะทักขาโต  ภาวิโต พะหุลีกะโต อะภิญญายะ สัมโพธายะ นิพพานายะ สังวัตตะติ ฯ ...........ปีติสัมโพชฌังโค โข กัสสะปะ  มะยา สัมมะทักขาโต ภาวิโต พะหุลีกะโต อะภิญญายะ สัมโพธายะ นิพพานายะ สังวัตตะติ  ฯ ...........ปัสสัทธิสัมโพชฌังโค โข กัสสะปะ มะยา สัมมะทักขาโต ภาวิโต  พะหุลีกะโต อะภิญญายะ สัมโพธายะ นิพพานายะ สังวัตตะติ ฯ ...........สะมาธิสัมโพชฌังโค โข กัสสะปะ  มะยา สัมมะทักขาโต ภาวิโต พะหุลีกะโต อะภิญญายะ สัมโพธายะ นิพพานายะ สังวัตตะติ  ฯ ...........อุเปกขาสัมโพชฌังโค โข กัสสะปะ มะยา สัมมะทักขาโต ภาวิโต  พะหุลีกะโต อะภิญญายะ สัมโพธายะ นิพพานายะ สังวัตตะติ ฯ ...........อิเม โข กัสสะปะ สัตตะ  โพชฌังคา มะยา สัมมะทักขาตา ภาวิตา พะหุลีกะตา อะภิญญายะ สัมโพธายะ นิพพานายะ  สังวัตตันตีติ ฯ ...........ตัคฆะ ภะคะวา โพชฌังคา ตัคฆะ สุคะตะ โพชฌังคาติ ฯ ...........อิทะมะโวจะ ภะคะวา ฯ  อัตตะมะโน อายัสมา มะหากัสสะโป ภะคะวะโต ภาสิตัง อะภินันทิ ฯ วุฏฐะหิ จายัสมา  มะหากัสสะโป ตัมหา อาพาธา ตะถาปะหีโน จายัสมะโต มะหากัสสะปัสสะ โส อาพาโธ  อะโหสีติ ฯ

------------------------
  
ที่มา http://www.dhammajak.net/suadmon1/119.html